得罪讲句,大部分香港议员喺交通系统规划认知方面都唔合格

 

得罪讲句,大部分香港议员喺交通系统规划认知方面都唔合格
由 Citobun – 自己的作品, 创用CC 姓名标示-相同方式分享 4.0, 连结

老实讲,我唔敢话我自己好劲,我只係都仲係读紧第一年姐。但係我见到多个由议员提出嚟嘅方案真心觉得唔係好掂。首先,我要强调嘅一样嘢係,佢哋提嘅方案唔係完全唔可行,可行就多数可行架啦,问题係钱银方面同埋效益方面。当然我都知一样嘢,就係无论做规划既做咗个几好嘅方案都好,最后决定嘅都係政治,而唔係规划个条友,所以间唔时会决定用啲短视啲嘅方案,原因只係依家唔洗俾咁多同兴建嘅时候冇咁烦。

跟住讲返朱凯迪议员同姚松炎议员提出嘅「启·行」无车路面,我知呀姚议员都有做有关方面嘅工作,所以有可能我依家係喺度班门弄斧。但係,我想讲嘅嘢係,我一直以嚟都反对有关用现代化电车系统去取代单轨铁路系统,无论係当年电车公司提出嘅时候定係依家。冇错依家阿朱议员同姚议员提出嘅方案的确有可取之处,但係我个人认为呢个方案影响嘅嘢係唔单单净係呢个系统沿途经过嘅地方,而係影响成个东九龙嘅交通策略。冇错,你会话,如果真係有必要嘅话,真係唔介意出咁多钱同时间去慢慢逐步改善成个东九龙交通策略。但係问题在于同样嘅改变唔会话用单轨就做唔到,而单轨仲可以避开部分难解决嘅问题。

首先,空气质素。单轨系统本身好过现代化电车嘅地方係佢高架嘅时候佔用嘅空间比较细,代表嘅係空气质素未必会认真差咗。仲有,我睇过啦,如果真係加单轨嘅话,行车线应该会友依家单向三条减少至两条,由于多咗单轨,理论上行车量应该会减少。所以届时空气污染情况应该点都会比依家好。不过,我要承认呢方面两位议员嘅方案係会好过政府嘅方案。

不过,噉唔代表问题解决咗,我睇番佢哋张图,第一个感觉就係乜够位咩,依家都只係得三线单行咋喎。电车用咗两条,净返够唔够位两边都整单车径架,我唔知香港标準几多,但係德国标準单车径都要起码2米阔(2米只係够两部单车并行架咋,所以独立单车径通常5米阔,咁样佢一定做唔到,所以唔驶啦),仲有行人路,分隔电车路同单车路嘅分隔带,仲有月台添。谂谂吓都觉得迫。

除咗土地问题之外,咁样地底嘅车辆废气都要抽风架,同埋俾唔俾人停车先,其他同佢本来连接嘅路咁点算呀,要落隧道连接呀定係上面过唔连接。总之,问题之多,并唔係我依家能够好详细咁讲晒出嚟。当然,都唔会冇办法嘅,只不过要做更多嘅研究先可以得到最终嘅结果。而我相信,政府本身嘅研究报告其实应该有考虑过呢啲问题。

最后,我真心想问一句,究竟单轨铁路有咩得罪你哋。我感觉係大家都唔係好想起佢,宁愿起条更加麻烦嘅现代化电车。依家嘅单轨铁路其实已经喺各方面都进步咗,就算,迟啲要连接周围更多嘅地方,佢都可以做到。同埋,唔係欧洲做到咩我哋就可以,好多嘢例如车流人流呢啲嘢都要计算架。

上一篇: 下一篇: